9:38 AM Прокурорын байгууллага хүртэл улстөрждөг боллоо | |
Улстөрждөггүй төрийн байгууллага гэж үгүй боллоо. Тухайлбал өчигдөр
Нийслэлийн прокурорын орлогч прокурор Ё.Сагсай хэвлэлийн бага хурал
зарлаж, "цочтол” шоудав. Хэзээ байхдаа Нийслэлийн прокурорын газраас
иймэрхүү асуудалд хэвлэлийн бага хурал зарлаж байлаа даа.
Хэвлэлийнхэнд мэдээлэл өгөх гэж дүлэгнэдэг тэд өчигдөр өөрсдөө
бидэнд хандав.
Тэрбээр Н.Энхбаярын шадар туслах Б.Тулгыг суллахыг шаардсан
МАХН-ын гишүүд гэх өвөө, эмээ нар Нийслэлийн прокурорын газрын
үүдэнд жагсаал хийж, хяналтын прокурор О.Мөнхбаатарыг ээрч
хоргоосон хэмээн гомдоллосон юм. Үүний төлөө л Нийслэлийн
прокурорын газраас хэвлэлийн бага хурал зарлаж, жагсагчдад сануулга
өгөв.
Ямар Монголд анх удаа жагсаал болж, Нийслэлийн прокурорынхон анх удаа
эсэргүүцэлтэй тулгарч байгаа биш. МАХН-ын гэх энэ даржин жагсаалаас
хүчтэй эсэргүүцлийн уриа лоозон барьсан хүмүүс элдэв байгууллага
руу дайрдаг л байсан.
Ахмадын чөлөөт холбооны Г.Баасан хүртэл "Ц.Нямдоржтой уулзуул” гээд
ХЗДХЯ руу дайрч байлаа. Гэхдээ тухайн үед ингэтэл улстөржиж "Манай
сайдыг Г.Баасан ээрч хоргоосон” гэж хэвлэлийн бага хурал зарлаж
байсныг санахгүй юм.
Тэгэхээр Нийслэлийн прокурорын газрын улстөржсөн энэ асуудлыг экс
Ерөнхийлөгч Н.Энхбаяр, ХЗДХ-ийн сайд Ц.Нямдорж хоёрын хэрүүлтэй шууд
холбож үзэхээс өөр арга алга. Мөн эдний хэрүүлд 100 хувийн сэтгэл
ханамжтай байгаа Ерөнхийлөгч Ц.Элбэгдорж, түүний "гар, хөл” гэгддэг
Улсын Ерөнхий прокурор Д.Дорлигжавын тушаалаар Нийслэлийн прокурор
газрын орлогч прокурор Ё.Сагсай хэвлэлийн хурал хийж, улстөржихөд
хүрсэн биз ээ.
Товчхондоо эдгээр эрхмийн хэрүүлийн хоморгонд прокурорын байгууллага
хүртэл өртчихөөд, ичих ч үгүй улстөржөөд явж байна. Хүчээр хийлгэсэн
иймэрхүү хурал ямар л өөдтэй болов гэж. Ё.Сагсай прокурор л жаахан
нүүрээ улалзуулах шиг болно лээ.
Нөгөөтэйгүүр экс Ерөнхийлөгч Н.Энхбаяр "Намайг хэлмэгдүүлэх гээд байна”
гэж хэвлэлээр зарлах болсон. Цаг үеийн ороо бусгаа байдлыг ажиглавал
үнэхээр ч хэлмэгдүүлэх гээд байгаа мэт үйл явдал энэ мэтээр өрнөх
болжээ. Гээндээ ч бий, гоондоо ч бий гэгчээр эдний аль алинд л асуудал
байдаг болов уу.
Юутай ч хоёр дарга хоорондоо хэрэлдэхээрээ төрийн байгууллагыг хүртэл
ичгэвтэр байдалд оруулдаг энэ асуудлаа хэзээ болих юм бэ.
Өглөөний сонин дээр гарсан материал
| |
|
| |
| Total comments: 0 | |